Member-only story
塘水滾塘魚
究竟Medium係通向大海嘅河流，定係一池死水？
對於香港寫作圈子嚟講，Medium係新興平台。由過往嘅陣地轉過嚟，相信唔少都係基於「文字有價」呢個概念。究竟喺呢度寫文，值唔值呢？
警告：以下有大量廢話，唔鍾意廢話，可以跳咗「反思」呢段。
有價嘅反思
「文字有價」係一個好得意嘅概念。世上仲有咩係會講「＿＿有價」嘅呢？好似冇乜。我聽過「生命無價」，但係從來都冇聽過人講咩「食物有價」㗎噃。因為呢啲係常識嚟。諒你都唔夠膽走入個街市菜檔，擸兩斤菜心，講句「我真係好支持本地農業㗎」，跟住俾隻手指公事頭婆，唔俾錢行返出嚟。正常嘅慣例，攞得上手嘅嘢，係要用錢去換嘅，冇得話我屋企煮多咗飯，我用兩碗飯換你半斤菜噉樣。我哋嘅世界係再進化咗，其實係連攞唔走嘅嘢，只要你係用咗人哋服務，都係要俾錢。好似話你去唱K，用咗個有冷氣嘅半隔音空間，一部電視兩支咪，加多個隨時可以播到冇人聲嘅流行曲系統，等你可以有幾個鐘頭對住字幕唱歌，呢個享受係要收費嘅。當然唔使講，如果你享用嘅服務係要有專人服侍你，好似律師喺電話俾法律意見你呀，按摩師幫你揼骨呀，甚至係歷史悠久嘅風俗行業都好，就算事後你滿唔滿意，都一樣要俾錢。
上面講啲咁常識嘅嘢，點解要用三個例子去說明？噉係證明咗呢啲係常識：無論係拎得上手，定係拎唔得走，甚至係你連冇份享用嘅嘢，大家都一樣係好習慣俾錢。地鐵巴士成日加價，但係有幾多個人會搭覇王車、或者用老人八達通呃半價？去餐廳食飯覺得啲嘢難食，甚至覺得俾人掠水，有幾多個人會拍枱走人唔找數呢？返寫字樓工嘅，你哋個 pantry 使唔使夾錢？有邊個夠膽同 admin 講：「我唔用微波爐㗎，我一個仙都唔出」？香港人可以話係文明世界嘅最佳僕人，只要大家認同某樣嘢要俾錢嘅，有拖無欠，最終一定還清。
返寫字樓工嘅，你哋個 pantry 使唔使夾錢？有邊個夠膽同 admin 講：「我唔用微波爐㗎，我一個仙都唔出」？
照上面講，大家熱愛俾錢到呢個地埗，好似假設咗所有嘢都係有 price tag 至係㗎？點解會普遍覺得萬物有價，唯獨係文字就免費呢？
其實唔見得大家認為文字係免費嘅。大家不知幾咁熱愛俾錢去買啲文字返屋企。好明顯攞得上手嘅文字，大家係樂意俾錢嘅。明明上面提到就算無形嘅服務、空間，我哋都好樂意俾錢，點會文字又唔肯呢？並唔係讀者唔俾錢，而係作者唔識得收錢呀！而讀者唔識俾錢，正正係因為「文字有價」呢個概念出咗問題。「文字有價」通常係講，因為作家寫字係技能，要練成一手好文筆，要下苦功，並唔係阿豬阿狗都做得到，所以好嘅文字，有價值。如果你認為文字有價值，應該係你睇得，就要俾錢，而唔係覺得一篇文章好，先至要打賞。前者係明碼實價嘅買賣，後者等同作者乞求讀者施捨。香港本來就冇俾貼士嘅文化，食三百蚊飯，你最多會俾幾錢貼士？講到食飯呢啲咁實在嘅享受，你都未必會因為啲嘢好食而俾多幾十蚊貼士，試問大家又點可以奢望有讀者用幾分鐘睇完篇文，會真金白銀打賞你呢？…
