回憶執屋之旅（三）

〈扮嘢〉

回憶執屋之旅（二）

我細個嗰陣轉過好多間幼稚園，我記得嘅都至少五間。如果唔係睇返舊相同埋搬屋紀錄，我都唔會知道自己讀過啲咩學校。聽講 4歲前嘅童年回憶基本上都係假嘅，主要只係靠睇相，或者聽屋企人講完，再重組返出嚟。幼稚園嗰三年，我只係記得一樣，可能係太大嘅童年陰影所以不幸記住咗。

老師當日要我哋玩個遊戲，就係排隊每人扮一隻動物，唔准重覆，扮完就可以放學。一班幾十人，要幾多隻唔同嘅動物呢？我諗到嘅豬、狗、貓、老鼠、蝴蝶、蜻蜓、青蛙、猩猩……都俾人做晒。去到我嗰陣，我都未諗到。老師於是俾人叫我排隊尾再慢慢諗。排得越後，即係選擇更少，根本係伏嚟嘅。

我當時嘅表情。Photo by Rishi Ragunathan on Unsplash

我以為自己諗到一個屈機嘅 option — — 「人」。點知俾我前面嗰一個扮埋。望住啲同學個個攞書包去門口放學，我就戇居居企喺個天台度諗動物名。我本來已經唔鍾意扮鬼扮馬，仲要連俾我 hea 過嘅機會都冇。好徬徨好無助，原來一個人冇晒 option 係會咁驚，咁失控，嗰種驚就好似大學生畢業前出唔到 pool 一樣。好快我就完全爆發，喊到癲咗：

「嗚呀～～～～～～～～～～」

之後有冇暈低我都唔記得喇。

喺我記憶入面，我都冇再主動去再扮任何嘢。我唔會模仿人哋動作、唔會扮人哋嘅表情、唔會扮人哋把聲，drama（話劇）就更加唔會玩。所以我好佩服有啲朋友轉述其他人嘅事，佢哋係可以七情上面，變晒聲，好似可以將人哋嘅表情聲線嵌入自己度，用自己塊面播一次出嚟噉。

我個「播放」掣係壞咗嘅，我淨係可以將自己嘅諗法、心情直接 output，要扮開心、扮唔開心、扮無嘢都唔係太得。一切嘅來源，可能只係因為呢一次嘅慘痛經歷。失去信心之後，以後就冇咗模仿能力喇。

嗰時我喺旺角一間天台幼稚園讀。事隔二十年之後重遊舊地，原址已經變咗做芬蘭浴。唔使 fact check 唔使 black list。

回憶執屋之旅（四）