「借錢梗要還」同「咪俾錢中介」究竟有咩關係？
ze3 cin2 gang2 jiu3 waan4, mai5 bei2 cin2 zung1 gaai3
有冇人知道「借錢梗要還，咪俾錢中介」呢十隻字，到底係講緊咩？拆開咗兩句我都明，但係放埋一齊就完全理解唔到。
呢句標語喺財務公司廣告後面經常會聽到，係放債人牌照嘅額外牌照條件指定嘅風險提示字句。
呢句嘢嘅作用，估計係用嚟忠告（zung1 guk1）大家，借錢之前要三思（saam3 si1），要考慮後果。點知上網一查，先至知道原來「咪俾錢中介」係講緊借錢嘅時候，唔好經過中介公司，直接搵財務公司／銀行。噉呢個就理所當然啦，中介都要食飯，食水唔深點生存呢？知道最後嗰五隻字係祈使句，係忠告嘅部份。問題係前面嗰句「借錢梗要還」究竟係咩意思呢？
首先我哋睇睇，呢種由兩句組成嘅複句標語，兩句之間可以有咩關係。複句可以按照邢福義 (2001:38) 做法，可分為「因果類」、「並列類」、「轉折類」三種。句式上一般以 「(連詞1) 句1，(連詞2) 句2」嘅形式出現；喺標語入面連詞通常可以省略，用意合嘅方式表達兩句之間嘅關係。但係無論係邊一種複句句式都好，擺得埋一齊，我去理解嗰陣我一定會假設兩句係相關嘅，呢個係人類理解語言嘅基本方式。
假設有網友順次序噉講呢兩句嘢：「某某KOL又喺度 share 葉劉啲相」「我覺得佢個 page 好好睇呀」，一般人會假設兩句唔係獨立存在嘅，「覺得好睇」應該唔係因為佢寫嘅分析精闢獨到，而係因為說話者好鍾意葉劉啲相。即係兩句「子句」嘅後句，會係對前句嘅補充、延伸、附加描述、邏輯上嘅結果等等。寫標語嘅人明白正常人理解文本嘅方式，所以可以善用呢點，飛走晒啲唚氣嘅連詞，寫出簡潔入腦嘅宣傳文本。
用返上面三種複句嘅分類去睇，標語後半叫我哋「唔好俾錢中介」，之前一句好合理嘅推斷係有以下嘅目的。
因果複句：話我知唔好俾錢中介嘅原因
因果複句係最常見嘅複句。常見嘅例子有：
- 酒精害人，開車前咪飲 [1]
- 預防禽流感，勿摸活家禽
- 電訊服務多又新，合約條款要睇真
- 年年驗身，令妳放心
- 性生活和諧，滿足又愉快
- 路上零意外，香港人人愛
- 密閉空間危機多，安全措施要做妥
- 裝修安全攞滿分，老闆伙記都開心
- 沉迷賭博，倒錢落海
- 電訊服務多又新，合約條款要睇真
- 阿婆跑得快，一定有古怪
- 阻人扑嘢，燒春袋
- 有你幫手，梗會成功
呢種係標語最常見嘅複句句式。標語嘅前半好應該一語中的，用幾隻字指出問題，例如某件事嘅因由、條件、假設。作為「咪俾錢中介」嘅前一句，可以有「中介食水深」「無良公司多」「行業欠規管」「借錢選擇多」呢啲配搭。呢幾句嘅共通點係「因為某種原因，可以推導出唔應該透過中介借錢呢個忠告」。如果「借錢梗要還」係唔透過中介借錢嘅原因，噉我嘅理解就係：因為借咗錢，係冇得唔還嘅，所以唔好經中介借錢，就算間中介公司執咗笠你都唔會有着數。
因果複句仲有好幾類，可以用前句去限制後句嘅適用範圍，例如「若要生活好（要買／勿買利物浦）」「唔係猛龍（唔過江）」「識得揀（你先至係老闆）」之類。不過呢種因果複句肯定唔適用嘅。因為「梗」係評價（evaluative）副詞，唔可以用喺條件句（conditionals）入面，所以「如果梗要去」「假使你梗唔識」都係錯 grammar 嘅。
並列複句：話我知除咗唔好俾錢中介之外，借錢嘅時候有咩要注意
難得諗一句標語，有時會想一物二用。好似「唔做中，唔做保，唔做媒人三代好」，其實係三個唔同嘅忠告，放埋一句去講，可以視作平排並列嘅表達方式。其他嘅例子仲有：
- 登記做選民，投票選賢能
- 生命滿希望，前路由我創
- 隨地吐痰乞人憎，罰款二千有可能
會唔會呢句標語係將兩項借錢須知放埋一齊，用並列嘅方法去講呢？即係政府係想提醒大家，借錢有兩點要注意，第一係「借錢梗要還，唔好走數」，第二係「咪俾錢中介，因為好戇居」。呢種理解唔係唔得，但係留意要進入並列結構，兩句嘅句類要係一樣嘅。例如「酒精害人，煙草傷身」兩句都係陳述句；「非禮勿視、非禮勿聽、非禮勿言、非禮勿動」係四句祈使句。如果要同後句「咪俾錢中介」並列，前句可以係「借錢搵銀行」「還錢交支票」「跑山要小心」「停低諗一諗」「簽約要留神」⋯⋯ 總之一定要係另一句相關嘅忠告。另一個問題就係兩句嘅忠告真係完全無關。提大家借錢要還錢，係講緊道德責任；唔好搵中介，係市民利益嘅問題。要當呢一句係並列的話，等同係叫一般市民，「返工要準時，提防扒手」。兩句都係合理忠告，但係放埋一齊就九唔搭八。
轉折複句：話我知點解我會好想俾錢中介，指出我嘅盲點
呢種嘅句式會講一講某件事嘅好處先，跟住再反駁返呢個睇法。「禮品雖然多」「就算 sales 好相與」「審查雖易過」等等，都可能係透過中介借錢嘅誘因，但係呢啲其實唔應該理。呢種標語好少，因為一般人 get 錯嘅機會極高，聽完之後可能覺得「兩害取其輕」呀，「兩邊都有道理」，仲反而更加想去搵中介都未定。而「借錢梗要還」都冇可能同中介組成轉折複句。
兩句之間有咩關係，我真係諗極都唔明。
有冇人財務達人可以指點迷津，話我知應該點樣理解呢十隻字。
[1] 部份嘅標語出處係來源： http://carson-chung.blogspot.com/2007/05/blog-post_08.html
P.S. 我見親呢句嘢都會浮現中學會考物理科嘅 MC 題目。當年嘅考法係俾兩句句子你，然後叫你判斷每一句嘅真、假，兩句都係真的話，你要判斷 第二句 係咪 第一句 嘅正確解釋。係就係兩句都啱，但係擺埋一齊，意義係零呀。
