邊得嚟咁多冷知識 … ？

早排為 Beginneros《冷知識手冊：吾港唔知》寫嘅序

「你啲冷知識咁凍，成個南極都俾你搞到結晒冰喇！」Photo by Eamonn Maguire on Unsplash

細個睇過一個日本節目，叫《Trivia之泉》，每集都會介紹一大堆冷知識嘅，然後啲嘉賓就會撳掣俾「吓！」，用「吓！」嘅數目去表達自己有幾咁驚訝。呢個節目黐線嘅地方在於，佢個個禮拜都有，做咗十年，邊得嚟咁多冷知識？我成日凝住呢啲冷知識會有上限，去到咁上下就會乾塘。正如全世界嘅「笑話版」其實都係炒冷飯，因為睇一兩個月你就已經窮盡晒全球嘅笑話。笑話都咁快用盡，噉冷知識，又頂到幾耐呢？

跟住我留意到一個叫 Beginneros 嘅網站。我見到佢哋 keep 住有堆冷知識，仲要日日都有出。吖佢哋不單只 keep 到，仲要啲嘢唔重覆㗎喎。不過又噉講，全世界嘅笑話橋 (kiu2) 可能就嗰一百幾十條，都無阻李力持年年出版一本笑話書；冷知識多到噉，長出長有都冇難度啦。不過寫序之前我都好有責任睇晒啲稿，望下啲料邊度嚟先。睇完都解答咗我一個疑問：

點解 Beginneros 啲人可以咁黐線，好似生成器噉變啲知識出嚟？

佢哋寫嗰啲嘢唔係常識嚟，而係一啲，正常人連問都唔會識問嘅嘢。即係同感情信箱唔同，佢哋唔可以整「乜sir冷知識信箱」，收一堆問題，答晒就一篇。佢哋入面係有一班高手喺度，可以對住平平無奇嘅事物都問到一大堆問題出嚟。就好似福爾摩斯嘅名句噉：

「You see, but you don’t observe.」（你得個望字，但係冇觀察囉。）

好多冷知識嘅來源就係我哋眼前嘅嘢。好似望到一個路牌，正常人係會諗：「哦，呢度就係XXX」，而我會走去諗語言學問題⋯⋯吖，點解「慈雲山」個「慈」係 Tsz，「牛池灣」個「池」係 Chi 嘅？

btw 我䁽過，今次冇呢條問題，想知點解歡迎留言。

而 Beginneros 條 team，就會整合到好多相關嘅問題、資訊。如果我要進入佢哋呢個冷知識達人狀態，我諗我會見到一大堆問題：

• 路牌有冇高度限制
• 路牌啲字用咩字體呢？
• 路牌由開埠到家下有幾多款呢？
• 幾遠先至有一個牌呢
• 全香港有幾多個路牌？
• 點解啲路牌要白底黑字？

以上嘅問題，喺呢本書係唔會有答案嘅，想知嘅話就叫佢哋出第二集啦。