Member-only story
通才主義係社會滅亡之路
古人好多事要親力親為，迫不得已樣樣都要識。一個讀書人除咗禮樂射御書數之外，可能仲識得耕田，識鬥木、識打鐵、識煮飯、識針黹，基本上係萬能嘅。
本來萬能人已經冇存在嘅必要：喺多人聚居嘅地方，開始出現分工，唔使每個人都識晒所有嘢。你想食豬肉你去搵豬肉佬，你想做衫你去搵裁縫。於是每個人可以搵樣自己叻嘅嘢去練，去搵食，又唔使嘥時間乜都自己做。呢種技術交換係現代社會嘅重要基石。
可惜呢樣嘢行咗幾千年，開始有一股逆流。越嚟越多人話呢種專才主義唔掂，令大家視野太窄，所以我哋要多啲通才，要啲人乜都識啲。於是大公司請人，成日追求全能，要 all-rounded 。最好就係表達上佳、體能好、有固定作息、識兩三種外語、文理商都掂等等。我唔質疑 all-rounded 嘅好處，但係假設所有人都以「成為通才」為目標，個個都要乜都識，結果可以好不堪設想。
喺有限嘅時間入面，每個人都可以學到一大堆技能，但係學多一樣嘢，意味住學其他嘢嘅時間會少，係取捨嘅過程。學校嘅教育正正就係喺廣同深之間做取捨，而過往嘅做法係取深，唔取廣。所以你會集中學幾科，中、英、數、常識，都要深入讀，其餘嘅事物就靠學生自己探索。如果成個社會都學識晒所有嘢，用土法煉鋼嘅方式學晒所有搵錢有用嘅技術，唔去深造，結果就係每個人都只係識少少扮代表。如果咁不幸大家都係睇住個就業市場，或者中小學收生邊樣技能吃香，再決定自己／仔女要學咩技能，相信會係另一種悲劇。當有一樣嘢係你識，其他人唔識，我哋叫呢啲做 edge。但係你識嘅嘢，同全世界一樣，噉即係求其一個人都可以取代你啦？噉你仲邊度有優勢？
好可惜，對於一個「每日有5個鐘課外活動，平均分做10等份，分別學「游水、乒乓波、寫程式、小提琴、畫畫、芭蕾舞、奧數、記憶法、毛筆字、西意法德任揀一款」嘅小朋友，佢哋永遠都唔會有足夠深度。你問任何一個有返咁上下成就嘅人，有幾多個係因為「識得多嘢」而成功？好多高深嘅技術，唔係靠一大堆家長計劃、課餘興趣班，每日定時定候逐少逐少噉學返嚟。更多時，係你對一樣嘢極有興趣，專心致志，由朝煲到晚，玩一個月、一年、十年，然後變到好叻。呢啲先至係 edge 嘅真締。
推廣通識嘅時候，不妨諗諗，搞到大家周身刀冇張利好，定係一個社會入面各人有自己嘅專長好？通才教育其實係行緊返轉頭，學返古人嗰套，所有人都學同一堆嘢，個個都半桶水，令到人同人之間嘅差異收窄，個個都係識嗰啲嘢。就算咁啱你學嘅嘢入面有一樣有用，你都唔會夠專心學一樣嘢嘅人咁好。記住，你識九樣膚淺嘅知識，點都及唔上一樣嘢學得深入。真正嘅分散投資，係成個社會去做，鼓勵大家揀樣自己鍾意嘅，本住有前冇後嘅心態去鑽研，社會先至會夠多元。當然揀錯嘢學嘅人，例如窮一生精力練天眼通嘅人，可能真係會餓死，但係噉樣做整個世代先至冇咁易俾人淘汰。
原文載於 爾雅集，原題為《亂世搵工之道，有前冇後打死罷就》
