填詞真係需要好大勇氣
我都寫過唔少垃圾出嚟，實在冇資格攞石頭掟死佢
粵語歌出名難填詞。本身粵語係聲調語言，每粒音可以填嘅字，受制於兩粒音嘅音程，音程同聲調緊密對應，跟唔足規則就會拗音，聽咗做第二隻字，或者好似以前啲教會歌噉。其他語言，好似英文日文韓文，睇落就簡單得多：幾乎係簡單到識得數字數，就可以填詞。
於是粵語填詞難，就俾人誤以為係啱唔啱音嘅問題。其實啱音與否，只係技術層面嘅事，係最基本嘅技術要求，正如歌手唱歌你要求佢唔好走音，學生作文你希望佢唔好寫錯別字一樣。你可以當佢係一條合格線：其他語言嘅歌詞，技術上 30分就叫合格；粵語嘅詞呢，要 70 先至合格。無論你用咩語言填詞，要去到「填得好」，都係有相當難度嘅。
正正因為其他語言技術上填咩字落去都得，所以會多啲人留意返舖排、內容，而唔會停留喺啲技術層面嘅問題。過往，要做到「唔好唔啱音」呢個要求，經已十分難得，所以大家關心嘅主要係，唱出嚟似唔似教會歌。但係隨住大家嘅鑑賞能力越嚟越高，口味越嚟越精緻，嘴刁嘅大眾就開始發現唔少膾灸人口嘅歌詞，取勝之處原來只係技術上嘅「一粒音都冇拗」，但係啲歌詞九唔搭八嘅。
但係九唔搭八唔係罪！
填詞就好似寫詩一樣，詩人用字，有自己一套，最高境界唔係用字循規蹈距，而係明明用字唔精準、用錯典故、唔合邏輯，但係你硬係覺得啲詞有 feel 。要用詞精準、入字啱音，唔係話好難，但係用幾百字營造意境，極難。歌詞嘅精髓，依然喺成篇嘅意境度。點解九唔搭八大家都咁有 feel ？高水準嘅歌詞係精密計算下用短短幾行觸動聽眾神經嘅巧妙文字。用唔關事嘅嘢刺激你嘅神經，然後你明明唔知佢噏乜，都一樣有共鳴，天下間嘅詩詞有幾多首可以去到呢個境界？
呢種歌詞其實有啲似新詩。凡人睇嚟，新詩一樣係九唔搭八，充斥住非為主流接受嘅行文。但係我哋依然相信新詩有文學價值。既然一首歌拎走個音樂，得返啲詞，係可以用朗誦嘅方式去演繹嘅，點解我哋可以當呢種歌詞係新詩去睇呢？好多九唔搭八嘅詞，其實意境嚟講易明過新詩好多，起碼我感覺到「王菲的孤寂」有幾孤寂，我理解到咩叫「我突然自己肯做飯」，但係我到而家都未知新詩嘅極限之作《聽陳蕾士的琴箏》入面「金色的太陽」點樣「擊落紫色的水晶」喎。
技術上，好多歌詞啲用字唔多準，甚至好難理解。但係技術問題同感染力係兩個層面嘅事。大家欣賞歌詞真係睇啲咁仔細嘅位？你想像吓，以下對話有冇可能發生？
