「老細」嘅正確寫法係 …

A 老細 B 老婿 C 老世 D 老噬

設計對白

好在香港流行「考正字」之前，百萬富翁呢個節目已經冇再做。如果唔係我預計會有大量呢啲「正字題」，做埋$1,000,000嘅題目都仲得。

有個流傳得好廣嘅講法，話「老細」要寫做「老世」，原因係日文有「世帶主」呢個詞，喺日本佔領香港嘅「三年零八個月」入面，喺香港實施日本嘅「世帶」制度，每次去到舖頭就要叫個「世帶主」出嚟，而「老世」就係指「世帶主」噉話。

聲稱「老世」係「世帶主」嘅論點

網上文章經常俾人左抄右抄，由於每一篇嘅內容、推論，基本都一樣，都有「翻譯叫世帶主出來」呢個情節，所以相信應該係有一個人寫咗篇文，跟住慢慢散佈開嚟，不過呢個源頭我仲未搵到。總之呢段文字本身已經非常可疑。不過佢犀利在於三分真七分假，所以咁多人信以為真；加上聽完之後好易覺得長咗知識，仲可以愛嚟考人顯得自己見多識廣，難怪呢啲「語源傳說」咁受落。

首先「世帶主」，而家寫做「世帯主」，讀音係「せたいぬし」，係真正嘅日語詞。

goo 網上詞典嘅解釋

又例如香督令第40號，喺疏散人口之後要制定戶口，確實係會用「世帶主」去指每一戶嘅主人。

出處：小林英夫〈太平洋戦争下の香港——香港軍政の展開〉http://repo.komazawa-u.ac.jp/opac/repository/all/10813/KJ00005119898.pdf

「老世＝世帶主」講法疑點重重

如果「老細」本來真係「老世」，來自「世帶主」嘅簡稱，我哋要解釋以下幾點：

• 「世帶主」嘅原義係「戶主」、「一家之主」，係家庭單位，並唔係商業登記單位。點解一般家庭嘅戶主唔可以叫「老細」？
• 點解 「世帶」呢種家庭單位，會演變成「事頭 — — 下屬」嘅從屬關係？
• 有得縮略語，應該曾經係生活上需要用嘅概念。噉點解「世帶」呢個詞，喺華文報紙入面可以完全搵唔到？點解「世帶主」呢個詞喺香港老人家嘅語言入面好似從來冇出現過一樣？