Member-only story
枱燈後面係我嘅另一生（粵譯）
Cantonese translation of « A Parallel Life / Awoken By A Lamp » (with slight modification)
尋常嘅朝早，我如常行路返學，聽住歌，諗住嘢。忽然之間：
砰！
我撞咗落燈柱，迷迷糊糊噉跌低咗喺地下。我見到好多血，好多血，好多血。跟住我暈咗。昏迷之後，我經歷咗完全唔同嘅人生。
我識咗一個女仔。見到佢我就會心跳加速，面都紅晒。我追咗佢好多個月，佢終於接受咗我。兩年之後，我哋拉埋天窗，好快佢就有咗我哋第一個BB。係個女嚟嘅。
大學畢業之後，我好快就搵到一份好好嘅工。我老婆可以做家庭主婦，專心喺屋企湊女。到個女兩歲嗰陣，我個仔都出咗世。佢哋係我人生嘅意義。我每朝返工之前，都一定會入佢間房度，睇下睡夢中嘅佢哋，對住兩個仔女喺度傻笑。
有一日，我坐喺梳化嗰陣，我留意到屋企盞枱燈有啲古怪。好似……反轉咗。佢仲係立體，不過⋯⋯有啲唔妥。盞枱燈有個四方形嘅燈座，紅底金邊，上面有個白色嘅燈罩。但係總之盞燈就有啲唔妥，我條頸郁唔到，我一路望住盞燈，我對眼離唔開。我成晚瞓唔着，一路望實。第二朝我冇返工。盞燈真係有啲唔妥。
我冇再食嘢。我初頭會離開梳化，去廁所。後尾我連廁所都唔使去，因為我根本就冇嘢落過肚。我望住盞燈，望咗整整三日。我老婆開始好擔心我，佢甚至搵咗啲朋友嚟試下同我傾。呢個時候我意識已經開始分裂，而我老婆已經恐慌到極點，準備帶啲細路去外家。就喺呢刻，我好似諗通咗啲嘢，簡直係醍醐灌頂。盞燈唔係真嘅。間屋都唔係真嘅。我嘅老婆、仔女……冇一樣嘢係真嘅！過去嗰十年嘅生活，通通都唔係真嘅！
盞燈開始越嚟越大、越嚟越闊。佢依然係倒轉咗，唔係，唔係上下倒轉，而係應該凸嘅地方佢凹，好似反咗出嚟一樣。慢慢盞燈闊到佔據咗我嘅視線，我唔再見到間屋其他嘢。跟住我睇到一笪紅色。跟住有人聲、有尖叫、有嘈音。隨之而嚟嘅係痛楚。好撚痛。我第一句講嘅嘢係：「我撞甩咗牙！」跟住我擘大眼。我喺行人路上面瞓低咗，周圍係一班我唔識嘅人，好多人嚇到呆咗，但係我係最唔知發生乜事嗰一個。
過咗一陣有個差人𢯊起咗我，拖咗我過對面馬路，掟咗我上警車嘅後座。我依然係一頭霧水，唔知發生緊咩事。
睇嚟係等唔切白車，所以車咗我去醫院，去照 CT scan。
三年。我經過咗三年嘅抑鬱。我一邊懷緬我失去咗嘅老婆仔女，同時嘗試去理解佢哋從來冇存在過呢個事實。我好驚我會黐線。我晚晚以淚洗面，望嘅就係發夢可以見返佢哋，可惜我從來都冇夢到過。我間中會見到自己個仔，不過要打側望，好彩嘅話會喺視野嘅外圍，睄到幾秒。佢嘅世界似乎永遠停留喺五歲，而我依然聽唔到佢講嘢。
