Kam、鳩、柒

關於 K97 嘅一啲反思（粗口注意）

#無聊觀察，非學術論文

Kam (kem5)、鳩 (gau1)、柒 (cat6) 三個形容人嘅形容詞（以下簡稱 K97），後兩者係指男性性器官嘅粗口字。本身指啲嘢其實唔重要，總之就係負面形容詞啦。怪人係世界普遍現象，並非香港太多人有 K97特質而令我哋發展出更豐富詞彙。同一語言有三個非常相似，高度重疊嘅嘅形容詞，可以同時存在而廣泛使用，必然有其原因，因此喺度由語言學角度探索一下。

坊間時有討論K97嘅具體指涉，有時會嘗試揾出三者對立，試圖揾出三者喺程度上、意思上點樣劃分。近義詞嘅辨義唔可以簡單用「精確對譯」方式解決 — — 譯做書面中文或者英文都唔會解決辨義問題。揾出三者嘅界線亦都必然徒勞無功。正如「靜雞雞」同「靜靜雞」唔係一個靜啲一個嘈啲嘅分別，近義嘅詞語好多時都係描述緊同一件事嘅不同狀態。所以K97可能係一種特性，一種「-ness」，無法仔細區分嘅。K97呢三個形容詞嘅狀態係三位一體嘅不同呈現，大概可以視之為同一種人嘅「本質」、「行為」、「結果」嘅描述。

Kam 作為一種本質，應該係一種狀態形容詞。
狀態形容詞可以用程度副詞修飾，例如可以話「好Kam」，「非常Kam」。但係作為狀態並唔係動作，所以冇得 Kam 緊、而家 Kam 。本質係唔可以改變嘅，例如一個人可以由核突變靚，你可以話佢「靚咗」，但係「Kam」真係自有永有，你可以話佢「本身就好 Kam」，好難有啲嘢係「越嚟越 Kam」。正如「我姓陳」你好難講成「我姓咗陳」。
始終可以俾人話 Kam，都係出於各種對社會規範唔認識，或者對世界有啲奇怪嘅假設之類，呢啲本質係好難改嘅。

鳩嘅重心係行為嘅無序性。亂講嘢、亂做嘢，都可以達成「鳩」。
你可以英雄一世，都可以因為衝動、欠缺預測性而做咗啲令人側目嘅行為。會欠缺預測性，可能你自己都唔覺，因為在你而言好合理嘅事，對周圍嚟講可能係好跳躍，好黐線。
鳩通常係作為狀語修飾動作，好少直接形容人。由於係「行為」嘅描述，大家會發現「鳩」通常係指某一時間、某一事件，一定要有事件去支撐嘅，唔會係模糊嘅印象。

柒，結果嘅外在呈現。平時係講外觀，但係亦會引伸到成件事嘅狀態。只要係結果好，效果ＯＫ，就唔可以用柒嚟形容。

三者嘅關連係：你份人 Kam，會做鳩嘢。做鳩嘢，鳩做嘢，就會柒。柒，如果唔係單純外觀，通常係鳩（行為）嘅結果，或者 Kam（性格）嘅外部呈現。

K97 之所以咁難拆，就係因為三樣嘢撈埋一齊，互為因果。有得一樣，好難冇其他兩樣。你好少揾到一個人係「好Kam，但係唔柒」。

相反，改好一樣，其他問題就會好返。對世界認識多啲就會唔 Kam，自然就做少啲講少啲鳩嘢，又唔會柒親人。行動前多啲思考就可以冇咁鳩，就少啲出錯，柒少啲。每件事都注重返結果同外表就可以冇咁柒，亦都會多咗經過思考嘅行為，唔會成日鳩下鳩下。
多咗思考都會改變本質，令你由 Kam 中恢復。

寫到呢度覺得自己有啲 Kem … 大家睇完就算唔好認真。