Google Sheets 示範客家話拼音數字轉調號

用 RegexReplace，ArrayFormula，TextJoin，一條公式搞掂客家話拼音數字轉調號

厓今下學客家話，愛整理下客家話嘅字音分自家用。今日做嗨一隻 Google Sheets 去將數字換做調號（diacritics），所以寫隻文章，講下吾嘅解決方法。

呢排我學緊客家話，遇到一個問題：啲詞語可以用漢字去寫，但係記字音要用拼音，由於有啲變調規則，用數字唔係咁直觀，轉做調號會睇得方便啲。香港客家話嘅調係噉樣嘅（略過變調規則）：

例子

【廣州話】「我叫阿擇，住喺將軍澳。」
【客家話】「厓安做亞擇，住在將軍澳。」
【拼音１】「ngai2 on1 zo4 A1 Cak6, cu4 coi1 Ziong1 Giun1 Au4」

拼音用數字應該要啲時間適應，為咗方便起見，如果啲聲調可以用調號呈現，學起上嚟就方便得多嘞。呢款拼音只係用咗四款調號：第一調（低升）係 Acute accent（「á」U+0301），第二調（低平）係 Macron（「ā」U+0304），第三、五調（中降）係 Breve（「ă」「ăk」U+0306），第四、六調（高降）係 Grave Accent（「à」「àk」U+0300）。

【拼音２】「ngāi ón zò Á Càk , cù cói Zióng Giún Àu」

以上係劉鎮發教授用嘅拼音，詳情可以睇客家大學堂。
唔識客家話嘅朋友，都可以試下聽，上面有字幕，有教學，聽幾個鐘頭就會開始識聽。

手頭上嘅材料用咗數字去寫，要逐個人手打成調號，實在太麻煩。所以首先我就用 Python 寫咗個程式轉做調號。拆開呢音節做 onset / nucleus / coda / tone，再將調號加喺主元音後面。

但係要大家執行 Python 程式碼實在太煩，如果可以直接一條 Excel （泛指所有試算表）公式可以直接轉換就好。