Freerider 呢個詞有兩個 r，可唔可以當 r 係粵語嘅音？

TLDR: 掃到最底你就知

Photo by Markus Spiske on Unsplash

話說最近有首歌叫 freerider⋯⋯

不過首歌同今次個post係無關嘅。

我知道好多人期待我俾個簡單嘅答案，一個 yes 或者 no。不過呢個問題並唔係咁簡單。首先我俾兩個例子你哋。

• 想像一班喺香港讀國際學校，講英文嘅人。佢哋唔識粵語，住嘅地方看更都識講英文，不過佢哋學識咗一個粵語詞，「靚仔」。佢哋係英文嘅單語話者，但係講「靚仔」嘅時候，就算啲發音鬼鬼哋，都唔會講做「𡃁仔」，因為高音咗對方就聽唔明。某程度上佢哋因為一個詞，令佢哋產出到一種聲調嘅差異。我哋會唔會話，「聲調」成為咗佢哋英文嘅音系一部份？會唔會話因為有一個用聲調區分嘅借詞，英文就變成一個有聲調嘅語言？
• 另一個情況，喺澳門嘅普通話人，見到「氹仔」呢個地名唔識讀，由於第一個字喺普通話冇，據講有啲人會模仿粵語嘅讀法，讀成合口嘅 [tam]。對於呢個澳門普通話人群體，我哋可唔可以話音節用 m 結尾係佢哋嘅音系一部份呢？

以上兩個情景並唔係完全虛構，而係實際上每個語言接觸都有可能發生嘅事。提出以上兩個例子係想大家反思「點先至係自己音系一部份」。上面嘅情景都係個別例子，只得一個「古怪音」，大家大可以當估孤例。若然係有堆英文人學咗一千個粵語詞，仲持續用喺自己嘅英文入面呢？呢件事冇乜可能，或者係因為 neoimperialism？香港嘅英文人根本就唔學粵語。

相反就好普遍：粵語入面有成千上萬嘅英語詞，而處理拼寫方案嘅人，一直都好頭痕，唔知當唔當佢哋係粵語音系好。今次傾嘅並唔係單純係假設性問題，而係粵語建設拼寫標準嗰陣會遇到嘅問題。如果個個粵語人都識講「free」呢個詞，噉「fr」係唔係就變成聲母（音節頭）嘅成員呢？換句話講，我哋想問應該用咩準則去衡量一個語言特徵「係」抑或「唔係」屬於一套音系。

開始討論之前我定義咗個問題先：如果某個音系特徵 x 喺原本嘅音系冇，但係喺 Ls（source language 來源語) 借入 Lb (borrowing language 接收語) 嘅借詞入面出現，我哋點樣決定佢係咪進入咗 Lb 嘅音系。我哋試下逐個方法去諗。