呢個字係「匪語」？

任何形式嘅「語言獵巫」都係語言發展嘅癌細胞

今次想講嘅係推廣粵文嘅時候遇到嘅「獵巫問題」。

揾匪語其實係一個獵巫（witch-hunting）嘅過程

每有文章用到「打造」「方方面面」「小三」是但一個詞，都梗係會有人指出作者用咗「匪語」。大家嘅龍門實在搬得太快，寫字嘅人根本跟唔切。用錯一字，就係匪敵入侵，爬格仔嘅、做廣告嘅，步步驚心。我相信大家都好想有一個「匪語清單」，幫大家揾出有乜嘢字詞唔用得。就此，吳志森 (2014) 曾經寫過以下嘅批評。

這種走火入魔的行徑，大部分時間都得啖笑，因為匪語不匪語，更不是一個人一個國師說了算。但對於我這種用文字語言搵食的傳媒人，卻不勝其擾。

做網上電台節目，與社交媒體掛鈎，與聽眾即時互動，有時的確很煩。有本土聽眾聽到片言隻語，即時在網上回應：森哥，呢句係「匪語」，嗰句又係「匪語」，以後唔可以講。做直播節目，從來是我口講我心，但自從有了「匪語」這個標準，令我欲語無言。

普遍本土派香港人，仲係有一種「正統」嘅思想，或者自以為係「花果飄零」後「華夏正統」所結嘅果，會將自己嘅語言習慣建立喺「抗匪」上面；明明係香港嘅語言習慣問題，都要用「國共對立」嘅意識形態去思考，搞到雲端上面群魔亂舞，阻住本土語言發展。

究竟乜嘢係匪語？

不過既然有人提出「匪語」呢個概念，我就嘗試幫大家反思「匪語」呢個概念。大家可以用 Highlight 嘅方式，揀選自己心目中認同嘅答案。

出現年份

• 1841年，香港開埠後？
• 1912年，中華民國成立後？
• 1917年，新文化運動後？
• 1949年，中華人民共和國成立後？
• 1967年，文化大革命開始後？

政治立場

• 中國國民黨
• 中國共產黨
• 非香港本土
• 香港政府

來源語言

• 中國境內語言（北方話／國語／普通話／上海話／客家話／閩南話／潮州話／滿州話／朝鮮話／維吾爾話／藏語／俄語等等）
• 英文／法文／葡萄牙文
• 日文／韓文／滿州話
• 文言文

社會階級

• 軍人