由「丁母憂」講起

jau4 “ding1 mou5 jau1” gong2 hei2

Photo by Fey Marin on Unsplash

前排娛壹用咗「丁母憂」呢個講法，有一班人出嚟嘈睇唔明，引起咗啲迴響。文化好啲嘅人慨歎大眾語文水平低落，「係咪唔識中文」；睇唔明嘅就覺得啲人寫嘢冇人明，當對方係史前生物之類。先旨聲明，我覺得傳統嘅講法係值得保留、流傳，唔係話舊嘅就要掉晒佢；我只係想大家諗下點解咁多人睇唔明，同埋我哋想大家睇得明乜嘢。

首先，講法失傳係因為語言習慣變化快，唔係後生嘅問題。一百年前成個漢字圈都係用文言文，仲保留咗好多傳統嘅祭祀習俗。你捉求其一個讀卜卜齋嘅細路，應該隨口都背到千字文，講到幾句四書五經。教育系統入面有嘅嘢，日常生活要用嘅嘢，幾蠢幾鈍嘅人都總會學識一二。環境有，大家唔使主動學都識；環境冇，教育制度冇，大家就唔會聽過，就係咁簡單。

你識多啲傳統嘅講法，未必係你學富五車，只不過係你夠老，咁啱有機會見到啫。