由「丁母憂」講起
jau4 “ding1 mou5 jau1” gong2 hei2
前排娛壹用咗「丁母憂」呢個講法，有一班人出嚟嘈睇唔明，引起咗啲迴響。文化好啲嘅人慨歎大眾語文水平低落，「係咪唔識中文」；睇唔明嘅就覺得啲人寫嘢冇人明，當對方係史前生物之類。先旨聲明，我覺得傳統嘅講法係值得保留、流傳，唔係話舊嘅就要掉晒佢；我只係想大家諗下點解咁多人睇唔明，同埋我哋想大家睇得明乜嘢。
首先，講法失傳係因為語言習慣變化快，唔係後生嘅問題。一百年前成個漢字圈都係用文言文，仲保留咗好多傳統嘅祭祀習俗。你捉求其一個讀卜卜齋嘅細路，應該隨口都背到千字文，講到幾句四書五經。教育系統入面有嘅嘢，日常生活要用嘅嘢，幾蠢幾鈍嘅人都總會學識一二。環境有，大家唔使主動學都識；環境冇，教育制度冇，大家就唔會聽過，就係咁簡單。
你識多啲傳統嘅講法，未必係你學富五車，只不過係你夠老，咁啱有機會見到啫。
另外，責怪大家唔查書都係好笑。標題嘅目標係咩？係瞬時嘅訊息傳達。以前報紙標題可能要對仗，要用典，睇報紙嘅唔明，可以問隔籬個茶客。轆 IG 係另一個生態，佢哋用緊一秒五個 post 嘅速度掃緊最新消息 — — 後生嘅可能更快 ，我哋呢啲老餅望塵莫及。問題係寫嗰個人有冇意識邊啲講法係大眾明，邊啲唔係：「祝融」借代「火」易唔易明，用「羅生門」去描述「各執一詞」易唔易明？大家都係估。如果寫嘢俾人話過難明嘅，下次咪翻手諗諗有冇嘢要加個細字註釋囉。Google 查就係人都識，你起個標題係咪就係為咗大家停低去學多個生字？
由解決問題嘅角度出發，如果大家對某啲傳統文化，包括用語、儀式，甚至係背後套世界觀係有感情嘅，想保留嘅，不如着手整理。香港有幾多個 NGO 推廣文化傳承，Google 下應該會知。「好嬲好嬲好嬲」完，不如順手 Like 多兩個傳統文化嘅 page （已經好廉價，我唔夠膽話咩課金呀，搞活動呢啲）。前排 Twitter 流行講 NMSL，我都唔覺得有人借機講下「丁憂」呢個講法，大把人抽水，就硬係唔覺有人用呢個機會推廣語文知識。
傳承一個詞語，只係一條 Fact，唔難，至少「丁母憂」而家全香港都識嘞。大家睇闊少少，成個現象都係返去文化傳承嘅問題。如果香港係一個文化圈，喺呢個圈入面，我哋想留低幾多嘢、邊啲嘢俾下一代？我冇答案，但係我希望大家會繼續揾答案，然後落手落腳去傳呢啲知識開去。
