連新加坡人都開始睇得起自己，香港人就繼續崇拜歐洲口音
Mar 31, 2021
港台抽起LMF訪問，覺得內容唔夠 decent，大家隨即挖出MC仁用流利法文接受訪問嘅片段，指出佢一口法文，比起廣播處長更加 decent。見到大家讚MC仁嘅呢種論調，居然經過幾日都冇人反駁，實在有啲唔舒服。
我細細個就開始聽LMF，佢完全係扭轉咗我對音樂嘅理解，擴闊咗個眼光。MC仁作為 rapper，作為藝術家，絕對值得大家欣賞讚嘆。但係你聽晒佢個訪問，你留意過佢嘅 rap，你理解過佢嘅思想，我諗你應該讚頌嘅絕對唔係佢嘅口音，唔係佢嘅法文。
將「識法文」當係「文化象徵」，當係「decency」嘅表現，就好似一班香港人依然停留喺十九世紀，對唔對得住全個東亞嘅反殖先驅呢？「解殖」係一切派別都日講夜講嘅課題，喺香港可以話係完全失敗——喺香港原來夠 white 就可以得到大家嘅青睞，尊貴、典雅呢啲概念，原來始終係同紅酒芝士掛勾。若果MC仁流利講到嘅係越南話？阿拉伯話？或者大家就會開始認真理解MC仁嘅內容。香港人未必個個都有中國小農DNA，但肯定有唔少陶傑門生。
我成日話歐西語言係香港嘅通行證，可以打破一切政治區隔。只要你講到性感嘅震脷音，咩分歧都可以暫時放低。政府不得人心咩？揾晒啲領導人子女出嚟曬下英文法文就得，見到高官啲洋人子女，啲反對聲音即刻冇噉一半呀。
吖，係嘞，我醒起我仲識得一個識講流利法語嘅中國人，你知唔知佢叫咩名？
