追遡最古老語言

True or False ：「粵語歷史悠久，有數千年歷史，表達能力豐富，讀古詩抑揚頓挫，有豐富文化底蘊，係漢語嘅活化石……」

要講「古老嘅語言」，當然要講吓粵語啦。

粵語歷史悠久，有數千年歷史，表達能力豐富，讀古詩抑揚頓挫，有豐富文化底蘊，係漢語嘅活化石……

上面呢啲粵語嘅賣點，相信大家都耳熟能詳。近代嘅廣東人多數都有一種「大中華認同」，講粵語嘅人經常以「漢族文化繼承人」、「正統漢人」自居，認定粵語係中華文化嘅長子嫡孫，為住呢份畸型自豪感，繼而開始咗一連串保衞中華文化血脈嘅行動，要將粵語呢隻「古老語言」發揚光大。保護語言，我係絕對唔會反對嘅。作為香港人，我當然唔希望粵語會消失。但係與此同時，我發現可能大家太過愛粵語，而視野亦都過度狹窄，所以大家討論粵語嘅時候，基本上只係會同相距十萬九千里嘅北方官話、普通話做比較，從而得出一大推錯誤嘅理據作為自己理論嘅基礎。喺度我試吓客觀噉比較語言嘅「年齡」。

世界上邊隻語言最靚？

首先我問你一個問題。你覺得世界上邊隻語言最靚？法文？意大利文？我唔知道，我唔係藝術家，亦都唔係愛國主義者。我嘅基因淨係教識我分到人（編按：女）靚唔靚，唔會分到語言靚唔靚。不過呢個係一個主觀嘅問題。你可以有你自己嘅原因去認定一隻語言靚或者核突－－法文可以好性感，因為佢旋律優美，初而平坦繼而高亢；亦都可以話佢好核突，隻隻字都好似吐痰吐唔出噉。不過呢啲都唔重要，因為一個有好多主觀情感嘅人嘅主觀感覺，並無對錯。正如唐明帝鍾意大肥婆楊貴妃，我唔可以話佢錯，頂多可以話佢眼光獨特。

不過一講到邊隻語言老，邊隻語言後生，就變咗一個客觀嘅問題。語言唔似樹，唔可以用樹紋去鑑別年齡。噉究竟點解大家成日話「某某語言有幾多幾多年歷史」？我試吓 present 幾種方法，睇吓大家buy邊樣。

方法一：搵返隻語言嘅生日日期

最理想嘅方法當然係搵返一隻語言幾時出世，幾時開始有人講呢隻語言。人究竟幾時開始識得講人話呢？我諗應該起碼都有20,000年。不過文字只不過得幾千年歷史，我哋無辦法用文獻去證明人類幾時識講嘢。

反而考古證據或者會幫到手，因為人類嘅頭部骸骨可以話俾我哋聽當時嘅人種有冇辦法發出可以辨義嘅聲音。噉邊一個地方最先有一啲似樣嘅頭骨，嗰個地方自然就係最古老嘅語言啦？噉又未必，因為 1)語言同種族唔係「一一對應」，有可能嗰啲古人頭腦發達，手腳簡單，最後俾講其他語言嘅民族消滅咗。

另外，你仲要假設唔同語言來源唔同，噉樣先至可以話一隻語言老過另一隻。假設語言只係得一個源頭，噉其實向上搵，世界上每隻語言一定會有共同嘅生日。如果你肯定語言有多過一個源頭，先至可以話有啲後生啲，有啲老啲。引伸落去，你話自己隻語言老啲，即係話自己嘅祖先進化勁啲，大腦早啲出現腦側化…