【粵拼教學003】蠢（ceon2）
🎶春虫虫🐝虫虫飛🍒飛到荔枝箕
開始之前，想問下大家仲記唔記得 chur 同 jer 嘅粵拼係咩呢？
每一課嘅內容，都係建基於之前嘅嘢，不過為咗減低大家嘅記憶負擔，我係絕對唔會順序教嘅。我只會將一啲同英文串法零舍唔同嘅拎出嚟傾。你記得呢堆特殊串法，其他就自然得心應手啦。
今次要介紹一個叫押韻嘅概念。
大家有冇聽過尹光呢？冇聽過尹光都應該聽開過 rap ？
佢哋講嘢嗰陣最後一個字都係「押韻」嘅，好似下面呢段：
你老豆我十零歲 就喺 Disco 做DJ (zei1)
個介紹人係我中學時期嘅一條茂利 (lei2)
佢老豆原來放貴利 (lei2)
佢阿媽幫手做登記 (gei3)
咁個仔就自然識埋啲人 唔三唔四 (sei3)
你會發現五句入面嘅最後一隻字： J、利、利、記、四，讀上嚟順口嘅，聽落又過癮嘅，因為後半部份嘅口形一樣。幾有詩意呢你話。
返去今日嘅主題先：eon
點解係 eo，唔係 oe？因為呢兩個音有微細分別。成日有人問我，點解咁煩㗎，要記串法。我心諗，英文嗰啲「hurt」「nerd」「bird」呢啲，大家咪又係死死地氣逐個去記？
當然 eo 同 oe 其實讀音唔同嘅：eo 口細 oe 口大，eo 短 oe 長。不過啲技術問題唔好理住，我哋繼續聽下《少理阿爸》先：
你有病呀 戇居居 (geoi1)
隊左咳藥水 (seoi2)
唔係做裝修
硬係要賣 天拿水 (seoi2)
你未出世係條精蟲另一半係卵 (leon2)
估唔到你唔精反而做左一粒懵卵 (leon2)
最後一隻字有 -eoi （居、水），又有 eon （卵）。
話人「懵卵」，即係話人「蠢」，原來呢兩個字係押韻嘅，佢哋嘅後半部都有 eon 呢個部份。我哋嚟一齊感受下呢個 eon 係咩感覺先。下面嘅文字請你用尹光腔讀出嚟。
睇你個樣咁醒 乜原來你咁論盡（leon6 zeon6）
條女講多兩句 你就乜春都信（seon3）
專人操盤高利潤（jeon6）
買金買到去倫敦（leon4 deon1）
畢生積蓄化灰燼（zeon2）
幾廿歲人未生埋個腦囟（seon2）
隻豬都冇你咁蠢（ceon2）
（自從有咗「倫敦金」騙案之後，一講蠢，我淨係諗起倫敦，如果你賣開倫敦金的話，多多冒犯唔好意思，仲有我屋企寢具好足夠，唔愛床單喇唔該。）
以上係一大堆同「蠢」字押韻嘅字，記住 ceon2 係蠢。
上次 chur 係 coe2，今次我哋換走咗 oe，變佢做 eon，就變咗個「蠢」字。
我教你一個記法：
CEO 好蠢；蠢就係 CEOn2。
最後，下面有一堆圖，大家估下係咩字啦。
leon1 骨
（唔係 Leon 黎明！）
同花 seon2
ceon1 天
zeon3？邊＿度zeon3？
練習：有邊首粵語歌係押「eon」呢個韻㗎？留言話我知吖！
大家記得拍多幾下手支持呀 😄
