【粵拼教學002】jer／啫（zoe1）
積少成多，慢慢就會學識晒
呢個係每次 5 分鐘嘅粵拼教學系列，未睇嘅話記住要由 001 開始睇：
上次講完 chur，今次要講嘅係 jer！
呢個音節有兩個用法，一個就係「jer住（zoe1 zyu6）」個 jer，一定要同「住」一齊用，意思大概係言語上不斷攻擊挑釁對方；另一個係男性性器官嘅暱稱「啫啫（zoe4 zoe1）」。
jer 嘅粵拼係 zoe1。
首先係呢個音節，一開頭係 z 呢個字母，發音近似普通話嘅 z 或者 zh。英文係冇呢個聲音嘅，所以用英文嘅規則，點都串唔出。
呢個 z 好多姓氏都有嘅，好似 張 zoeng1、蔣 zoeng2、朱 zyu1、習 zaap6、鍾 zung1、趙 ziu6、周 zau1、詹 zim1、鄭 zeng6、莊 zong1 等等。
你可能會問，呢啲姓氏用英文寫，好多時都係 Ch 㗎噃，點解唔係拼 c 嘅？
因為粵語博大精深吖嘛，英文嘅串字規則，又邊有可能記得到粵語嘅所有發音呢？
係噉嘅，好似立法會有個議員叫「蔣麗芸」，呢個姓好多時英文都串做 Ch。用英文讀呢個名就會變咗「娼拉瘟」。呢個核突讀音係「英文模仿粵語嘅讀法」嘅結果，實際上「腸」「蔣」喺粵語唔同音：前者呢啲用粵語讀都真係似 ch 嘅，串做 c；後者呢啲粵語讀唔送氣嘅，就串做 z。
總之，「Z」就直接將隻字轉做「之」字。
（喂上面呢句粒粒音都係 Z 開頭㗎！）
中間嗰部份，喺 chur 嗰課都介紹過，呢個O住個嘴讀嘅元音 oe，係唔捲脷，冇RRRRRR音嘅聲。chur 係 coe2，jer 就係 zoe1。記住粵拼入面 zoe 唔係英文名嗰個 Zoe （ˈzəʊ.i ／蘇怡）喎，因為 oe 係一個音嚟嘅。
今次要大家記多兩個聲調。上面講過「啫啫」讀法係 zoe4 zoe1，先低後高。第 4 調同第 1 調，分別係粵語入面最低同最高嘅調。所以以後唔使由頭數聲調嘞，最低音嘅音就 4（e.g. 陳瀅、劉華），最高音嘅就 1 （e.g. 街坊、師奶）。好多雙音節嘅暱稱，都係「4–1」呢個低高格局嘅。你哋又識幾多個呢？
不過有種煲叫「啫啫雞煲」，就一定會叫 zoe1 zoe1 雞煲至得，兩粒音都要高音。如果係「zoe4 zoe1 雞煲」，噉就真係你食埋我嗰份喇。
同樣都係 zoe- 開始嘅音節，我哋試下加啲韻腳喺後面先：
* 張 zoeng1，蔣 zoeng2，脹 zoeng3，象 zoeng6，
* 一隻「雀」zoek2，「着」衫 zoek3，得「着」 zoek6
爭啲唔記得講，香港有個歌手叫Gem，讀法係 zem1，千祈唔好讀錯做 zoem1 呀，唔係就變咗做英文嘅「細菌」㗎喇！
二揀一
練習一：寫一個 *每粒音都係由 z 開頭* 組成嘅詞語、短語，好似「摺紙」「盡責」「卒之」⋯⋯
練習二：寫一句全句都係第 4 調嘅句子，睇下邊個作得最長。作完記得試下一口氣讀出嚟。
例：「劉華原來時時嚟何文田」
