收視率係統計分析，點解我都係唔信佢？

收視率個計法冇問題，問題係大家想要嘅唔係收視率

Error 成員 193，網上圖片

前排 193@Error 恥笑無綫嘅收視淨係靠幾百部電視機計出嚟，大快人心之餘，仲帶挈到成個 ViuTV 人氣急升，今個月我認真知道佢咩料喇。不過關於收視率，係咪真係唔使理呢？我諗就算係 ViuTV 高層都唔夠膽講呢句。因為大家真係要一啲指標去睇下觀眾反映，就好似咩學校排名，全球乜乜物物指數噉。而大家聽到嘅收視率統計，係好有用嘅參考指標，仲係三台都有做嘅。

其中下呢篇文就講咗點解收視率真係要睇，大家唔好自 high：

電視台「收視率不用理」？--萬物事出必有因 | 輔仁文誌

睇完之後又唔使擔心，收視率唔夠高又唔係代表個電視台冇人睇。因為任何統計測量都要睇佢嘅取樣方式，要有廣泛代表性。CSM 網站有提到佢哋計數嘅 Gold Standard，但係冇詳細講佢點樣揀人。

不過如果佢哋係揀 1000 戶「有睇電視習慣嘅人」，噉出嚟嘅收視只係反映電視常客嘅口味。呢班「電視餸飯」嘅人嘅口味，可能同一般人有啲唔同。我假設平日完全唔會開電視嘅人，應該唔會符合採樣嘅資格，你諗下人哋就揀得一千個家庭，但係香港可能過半家庭平時唔會開電視。佢哋會唔會揀呢啲唔開電視嘅家庭出嚟？淨低會開電視嘅，可能係一班電視播雪花都照開嘅人，開個電視聽聲嘅人，收視率就係睇緊呢班人睇緊啲咩。

噉平時唔睇嗰啲呢？為咗某個節目而打開電視嗰啲呢？唔會納入去，因為佢哋冇習慣，完全係因為個別節目先至睇，唔會加入統計。但係睇返 noise，睇宣傳效果，呢班先至係最大嘅潛在客户，而呢種節目可以 convert 到啲人去建立新習慣，呢啲先至係最犀利。

噉收視反映咗啲咩呢仲？就係 Viu 「間中有啲節目好正」嘅口碑，未足以令大家建立「播雪花都要開住個 99 台」呢個習慣。不過照顧得到「電視餸飯」嗰班，就會唔再型，就會開始墮落。

所以有時都寧願佢永遠做有威脅嘅第二名。