我唔信！講普通話嗰啲一定唔係香港人！

前言：聽朋友講，話見到土生土長嘅香港細路用普通話溝通，覺得不寒而慄；跟住有人就話佢哋係新移民、雙非、黑工子女，講到好似覺得真香港人冇事，唔使擔心噉。我覺得我要講吓自己對呢個現象嘅睇法同對策。

香港一向都多新移民，主權移交之後可能再多咗。但係以往嘅人喺學校、喺社區都會用粵語溝通，至少喺兩個人講唔同家鄉話嗰陣，粵語會係最正常嘅交際語。家吓呢，係成日見到兩個粵語人，用普通話溝通。就算次次你都話佢哋係新移民，一樣令人憂慮。何況而家已經去到土生土長香港人都間中攝一兩句普通話。

講到語言，一般人就冇乜腰骨，亦都難怪。「語言用嚟溝通」呢個概念好根深蒂固。否則我哋粵語邊度嚟咁多借詞先？大家關心內容，多過關心你用乜嘢話，所以轉台，一般人根本就唔會察覺，更莫講話會覺得唔妥嘞。

當然你可以話有容乃大，我哋應該接受香港係文化多元乜乜物物，所以多幾隻語言冇所謂。我知道有啲人好buy呢套，即係 translanguaging…